Kréatif Nemen, Bocah Enom Tegal Kiyé Nggawé Kerajinan seka Limbah Pring

Hendri Siswantoro nyekel teko sing digawe seka pring.

TEGAL - Kréatif nemen bocah enom sing arané Hendri Siswantoro (29) warga Désa Bumijawa, Kecamatan Bumijawa, Kabupatén Tegal. Dhéwéké usaha nggawé kerajinan kaya téko, cangkir, nganti wadah rokok, seka bahan limbah pring.

“Usaha nggawé kerajinan seka limbah pring kuwé molai wulan Mei tahun 2021. Ndilalah nang Bumijawa akéh dapuran pring. Dadi seka kuwé dhéwék manfaatna limbah pring kuwé nggo digawé neng nyong kerajinan,” tuturé Hendri maring PanturaPost, dina Saptu (5/11/2022).

Jaréné, nganggo téko, cangkir lan nampan sing bahan dasaré pring kuwé wis dadi kebiasaané wong kuna. Tapi kerajinan sing dhéwéké gawé dihias karo gelas sténlis sing dipadukna karo limbah pring.

“Gelas pringé dhéwék padukna karo gelas sténlis ébén lewih kekinian. Nggo wadah rokok lan korék kuwé full seka limbah pring. Wadah kiyé ébén sing ngrokok lewih kerén wadahé lan wadah koréké ora gampang ilang,” jelasé.

Hendri njelaskan prosés nggawé kerajinan seka pring osmosis dilakokna lumayan suwé. Sadurungé digawé kerajinan, pringé dikum disit karo banyu uyah lawasé telung dina. Tujuané nggo ngurangi kandungan banyu neng njero pring. Latané kualitas pringé dadi lewih apik karo ora njamur.

Sawisé dikum karo banyu uyah, nembé prosés nggawé kerajinané. Molai seka nggawé lan nugeli pola sesuai bentuké. Latané diamplas nganti alus. Latané dirampungna karo nganggo coating sing bahan dasaré banyu. Supaya aman wektu dienggo nggo wadah inungan.

Saliyané nang wilayah Tegal, jaré Hendri, hasil karyané uga didol nang luar kota kaya Subang, Tangerang, Semarang, Cikarang, lan Bandung.

Nggo regané molai seka Rp 25 éwu nggo gelas ukuran cilik. Gelas ukuran gedhé Rp 45 éwu. Wadah rokok lan korék didol Rp 50 éwu. Céléngan karo rega Rp 90 éwu, lukisan pring Rp 150 éwu -Rp 200 éwu, lampu dinding Rp. 150 éwu. Sementara nggo sa sét poci, gelas lan nampan didol karo rega Rp. 250 éwu.

Sadurungé nekuni usaha kerajinan pring kiyé, Hendri sempet ngranto dodolan sega goréng. Latané nggawé usaha kripik nganti dipasarna nang wisata Guci. Tapi wayah pageblug teka lan wisata Guci tutup, usaha kripiké molai reb lan kepaksa tutup.

Lagi taun 2021 wektu koréké sering ilang, dhéwéké nduwéni inisiatif nggawé korék karo bahan pring. Ora nyana, jebulané akéh sing minat. “Seka kono kuwé molai nggawé kerajinan seka limbah pring. Sawisé kuwé, nggawé cangkir pring, gelas, terus nggawé lampu dinding, lukisan, lan akéh liyané,” pungkasé. (*)